Фарғонада “Инсон” ижтимоий хизматлар маркази ходими бахтсиз ҳодиса оқибатида ҳалок бўлди
Ҳудудни тозалаш ишлари вақтида ўт ўриш қурилмасининг тиғи узилиб чиқиб, ходимнинг юрагига санчилган.
Фарғона вилоятининг Учкўприк туманида ободонлаштириш ишлари вақтида «Инсон» ижтимоий хизматлар маркази ходими бахтсиз ҳодиса оқибатида ҳалок бўлди.
Маълум қилинишича, ҳодиса 2026 йил 29 июль куни Учкўприк туманининг Қўқонбой ҳудудида содир бўлган.
Дастлабки маълумотларга кўра, туман «Инсон» ижтимоий хизматлар маркази ходимлари ҳудудни ободонлаштириш ва тозалаш ишларига жалб қилинган. Иш жараёнида 34 ёшли марказ ходими Тоҳиржон Жўраев ўт ўриш қурилмасидан фойдаланаётган вақтда қурилманинг ўткир металл тиғи узилиб чиқиб, унинг кўкрак қисмига санчилган.
Олинган оғир тан жароҳати оқибатида ходим воқеа жойида вафот этган.
Kun.uz хабарига кўра, мазкур ҳодиса нашрнинг бир-биридан мустақил икки манбаси воқеа содир бўлганини тасдиқлаган.
Шунингдек, ҳодисадан сўнг Ижтимоий ҳимоя миллий агентлиги директори Мансур Оллоёров воқеа жойига бориб, марҳумнинг оила аъзолари билан учрашган.
Нашр суҳбатлашган манбалардан бирининг таъкидлашича, «Инсон» ижтимоий хизматлар маркази ходимларининг маҳаллаларни ободонлаштириш ишлари уларнинг хизмат вазифаларига кирмайди. Манба давлат буджети ташкилотлари ходимларини бундай ишларга жалб этиш амалиёти бекор қилиниши лозимлигини қайд этган.
