FIFА 4,2 миллиард долларлик хусусийлаштириш режасидан воз кечди
Инфантино FIFАнинг тижорат ҳуқуқларининг бир қисмини сотиш режасидан воз кечиш тўғрисидаги қарорини тасдиқлади.
FIFА Жаҳон чемпионатларини ташкил этиш билан шуғулланувчи янги компания улушининг бир қисмини хусусий инвесторларга сотиш орқали 4,2 миллиард доллар жалб этиш режасидан воз кечди. Бу ҳақда BBС хабар берди.
Маълум қилинишича, FIFА президенти Жанни Инфантино ташкилотнинг тижорат фаолиятини юритувчи янги компаниясининг 20 фоизлик улушини хусусий инвесторларга сотишни таклиф қилган. Ушбу лойиҳа орқали FIFА бизнеси 20 миллиард долларга баҳоланиб, 4,2 миллиард доллар инвестиция жалб этилиши кўзда тутилган эди.
Бироқ мазкур ташаббус UEFА, Осиё футбол конфедерацияси ҳамда Шимолий ва Марказий Америка футбол конфедерацияси томонидан кескин танқид қилинган. Улар Жаҳон чемпионатлари каби нуфузли мусобақаларнинг тижорат манфаатлари йўлида хусусий инвесторлар иштирокига берилишига қарши чиққан.
Жанни Инфантино барча томонларнинг фикрларини ўрганиб чиққач, лойиҳа футбол ҳамжамиятида жиддий келишмовчиликларни келтириб чиқаргани сабаб уни амалга оширмасликка қарор қилганини билдирган.
Шунингдек, лойиҳа фонида FIFА президентининг катта маслаҳатчиси Карлос Кордейро истеъфога чиққан. У мазкур ташаббус футбол манфаатларига мос келмаслигини таъкидлаган.
