Газ баллонлари кечикиши юзасидан текширув бошланади
Энергетика вазирлиги суюлтирилган газ таъминоти бўйича мурожаатларни назоратга олди.
Энергетика вазирлиги суюлтирилган газ таъминоти билан боғлиқ мурожаатлар ва ижтимоий тармоқларда тарқалган шикоятлар назоратга олинганини маълум қилди.
Қайд этилишича, интернетда Фарғона вилоятининг Қува туманида аҳолига суюлтирилган газ баллонлари қарийб 100 кундан буён етказиб берилмаётгани ҳақида тарқалган хабарлар юзасидан ўрганиш ишлари олиб борилади.
Шунингдек, суюлтирилган газ баллонларини етказиб беришдаги кечикишлар, уларни ўз вақтида тўлдириш жараёни ҳамда истеъмолчиларга кўрсатилаётган хизмат сифати таҳлил қилинади.
Бундан ташқари, газ баллонларини тарқатувчи ходимларнинг муомала маданияти билан боғлиқ ҳолатлар ҳам ўрганилиб, аниқланган камчиликларни бартараф этиш бўйича тегишли чоралар кўрилиши билдирилди.
Вазирлик маълумотига кўра, сўнгги ойларда республика ҳудудларида суюлтирилган газ таъминотида кузатилаётган муаммоларни босқичма-босқич бартараф этиш ишлари давом этмоқда.
Ҳозирда Ўзбекистонда 3,7 миллион хонадон суюлтирилган газдан фойдаланади. Тизим рақамлаштирилганига қарамай, газ баллонларини ўз вақтида етказиб бериш билан боғлиқ муаммолар тўлиқ бартараф этилмагани қайд этилди.
