Италия Испания билан Шенген келишуви амалини вақтинча тўхтатди
Чекловлар дастлаб 30 кун давомида амал қилиши режалаштирилган.
Италия ҳукумати Испания билан Шенген келишуви доирасидаги эркин ҳаракатланиш тартибини вақтинча тўхтатиш ҳамда чегара назоратини қайта жорий этиш тўғрисида қарор қабул қилди.
Италия Бош вазири Жоржа Мелонининг маълум қилишича, чекловлар зарурат сақланиб турган давр мобайнида амал қилади. Унинг таъкидлашича, ушбу чоралар ёзги сайёҳлар оқимига имкон қадар салбий таъсир кўрсатмаслиги учун барча зарур саъй-ҳаракатлар амалга оширилади.
Шунингдек, Мелони Италия Испания ҳукуматига миграция инқирозини бартараф этишга қаратилган Европа ташаббусларини қўллаб-қувватлашга тайёрлигини билдирган.
Маълум қилинишича, Италия ушбу қарор ҳақида Европа Комиссиясини хабардор қилган. Дастлабки маълумотларга кўра, вақтинчалик чекловлар 30 кун давомида амал қилади.
Бу Италия томонидан Шенген ҳудудида чегара назорати вақтинча тикланаётган илк ҳолат эмас. Аввалроқ ноқонуний миграция оқимининг кучайиши сабаб Словения билан чегарада ҳам шундай чоралар жорий этилган эди.
Қарор Испаниянинг Сеута ҳудудида кузатилаётган миграция инқирози ортидан қабул қилинган. Маълумотларга кўра, минглаб муҳожирлар Марокаш томондан Сеутага киришга уринган, натижада ҳудудда гуманитар ва хавфсизлик билан боғлиқ вазият кескинлашган.
