“Маҳаллада ободлик ва меҳр-саховат ойлиги”: масъулларга аниқ вазифалар юклатилди
Тошкентда маҳаллаларни обод қилиш бўйича 1 200 га яқин масъул иштирокида йиғилиш бўлиб ўтди
Тошкент шаҳрида “Маҳаллада ободлик ва меҳр-саховат ойлиги” доирасида кенгайтирилган йиғилиш ўтказилиб, маҳаллаларни обод қилиш, куз-қиш мавсумига тайёргарлик ҳамда аҳоли бандлигини таъминлаш бўйича устувор вазифалар белгиланди.
Шайхонтоҳур туманидаги Алишер Навоий киносаройида бўлиб ўтган тадбирда Президент Администрацияси вакиллари, Тошкент шаҳар прокуратураси, Ички ишлар бош бошқармаси, Миллий гвардия, коммунал хизматлар, Бошқарув сервис компаниялари, «Маҳалла» уюшмаси мутасаддилари ҳамда пойтахтдаги барча маҳалла фуқаролар йиғинлари раислари иштирок этди. Йиғилишда жами 1 200 нафарга яқин масъул ва раҳбар қатнашди.
Тадбир давомида кўчалар, ҳовлилар, ариқ ва хиёбонларни ободонлаштириш, кўкаламзорлаштириш ишларини жадаллаштириш, маҳаллалардаги инфратузилма муаммоларини бартараф этишга қаратилган лойиҳаларни ишлаб чиқиш, ишсиз фуқароларни даромадли меҳнатга йўналтириш ҳамда коммунал хизматлар фаолиятини яхшилаш бўйича масъулларга аниқ топшириқлар берилди.
Қайд этилишича, ушбу чора-тадбирлар маҳаллаларда обод муҳит яратиш, инфратузилмани ривожлантириш, аҳоли бандлигини ошириш ва ҳудудларни куз-қиш мавсумига пухта тайёрлашга хизмат қилади.
