Наманган ва Тошкент вилоятларида қарийб 12 кг гиёҳвандлик воситаси мусодара қилинди
Тезкор тадбирлар давомида наркосавдогарлардан гашиш, шунингдек, минглаб АҚШ доллари ва миллионлаб сўм пул маблағлари ашёвий далил сифатида олинди.
Наманган ва Тошкент вилоятларида ўтказилган кўп босқичли тезкор-қидирув тадбирлари давомида қўшни давлатдан олиб келинган йирик миқдордаги гиёҳвандлик воситалари ноқонуний айланмадан чиқарилди. Бу ҳақда ДХХ хабар берди.
Наманган шаҳрида ҳаракатланаётган «Nexia» русумли автомобиль тўхтатилиб, кўздан кечирилганда йўловчилардан бирига тегишли целлофан пакет ичидан 944 грамм гашиш моддаси аниқланган. Терговга қадар текширув давомида ушбу фуқаро гиёҳвандлик воситасини Наманган шаҳрида яшовчи шахсдан 9 900 АҚШ доллари эвазига сотиб олгани маълум бўлган.
Тезкор тадбирларнинг навбатдаги босқичида мазкур наркосавдогар қўлга олиниб, ундан 9 200 АҚШ доллари ҳамда 18,4 миллион сўм ашёвий далил сифатида олинган.
Шунингдек, Андижон вилоятида яшовчи икки нафар шахс ҳаракатланаётган «Lacetti» автомашинасидан 9 килограмм 801 грамм гашиш моддаси мусодара қилинган.
Бундан ташқари, Тошкент вилоятининг Бекобод шаҳрида ўтказилган тезкор тадбир давомида наркокурерлар томонидан «закладка» усулида яшириб кетилган 977 грамм гашиш моддасини олаётган маҳаллий фуқаро қўлга олинган.
Шу тариқа, ҳар икки ҳудуддаги тезкор тадбирлар давомида жами 11 килограмм 722 грамм (11,7 кг) гиёҳвандлик воситаси ноқонуний муомаладан чиқарилган.
Мазкур ҳолатлар юзасидан гумонланувчиларга нисбатан жиноят ишлари қўзғатилиб, тергов ҳаракатлари олиб борилмоқда.
