Қорақалпоғистонда фуқаро машинаси хатлангач, зарарни тўлашга мажбур бўлди
Маълум бўлишича, фуқаро газ тармоғига яширинча уланиб 25 млн сўмдан зиёд зарар етказган.
Фуқаро Д.Ш. ўзининг яшаш уйига табиий газни тўғридан-тўғри резина шланг орқали улаб, ноқонуний фойдаланиб келганлиги оқибатида “Элликқалъатумангаз” таъминоти бўлимига жами 25,5 млн сўм зарар етказган.
Етказилган зарарларни ундириш ҳақида Жиноят ишлари бўйича Элликқалъа туман суди томонидан қарор чиқарилган.
Ушбу суд қарорига асосан чиқарилган ижро варақа Мажбурий ижро бюроси Элликқалъа туман бўлими иш юритувига келиб тушган ва бўлим давлат ижрочилари томонидан ижро ҳаракатларига киришилган.
Хусусан, бўлим томонидан қарздорга ижро ҳужжати талабини ихтиёрий равишда бажариш учун 15 кунлик муддат берилган.Берилган муддат ичида, қарздор томонидан ижро ҳужжати талаби ихтиёрий равишда бажарилмаганлиги сабабли, унинг номидаги “COBALT” русумли автомашина тегишли тартибда хатланган.
Шунинг натижасида, қарздор “Элликқалъатумангаз” таъминоти бўлимига етказилган 25,5 млн сўм зарарни жорий йилнинг 30 июль куни тўлиғи билан тўлаб берган.
