Сеутадан Марокашга 70 мингга яқин ноқонуний мигрант қайтарилди

 

Испаниянинг Сеута анклавида юзага келган мигрантлар инқирози ортидан қарийб 70 минг ноқонуний мигрант Марокашга қайтди. Бу ҳақда EFE агентлиги хавфсизлик идоралари маълумотларига таяниб хабар берди.

 

Маълум қилинишича, сўнгги 30 соат ичида тахминан 69,5 минг нафар мигрант Сеутадан Марокашга қайтган. Агентликнинг қайд этишича, ушбу рақам оммавий оқим бошланишидан аввал шаҳарда бўлган айрим мигрантларни ҳам ўз ичига олиши мумкин.

 

Ноқонуний мигрантларнинг оммавий қайтиши Испания ва Марокаш ўртасида ҳужжатсиз муҳожирларни соддалаштирилган тартибда қайтариш бўйича эришилган келишувлар ҳамда Сеутадаги мураккаб гуманитар вазият фонида бошланди. ЭФE маълумотига кўра, 85 минг аҳолига эга Сеута шаҳрининг инфратузилмаси юз минглаб одамларни қабул қилиш имкониятига эга эмас. Озиқ-овқат, савдо ва хизмат кўрсатиш тизимлари ҳам жиддий босим остида қолган.

 

Испания Ички ишлар вазирлиги ноқонуний мигрантларнинг қайта кириб келишининг олдини олиш мақсадида Тарахал чегара ҳудудида қўшимча тўсиқлар ўрнатиш ишлари бошланганини маълум қилди.

 

Шунингдек, El Pais нашри маълумотига кўра, чегарани денгиз орқали кесиб ўтишга уринишлар оқибатида ҳалок бўлганлар сони 67 нафарга етган. Қидирув-қутқарув ишлари давом этмоқда.

 

Мигрантлар инқирози июль ойининг охирларида кескин тус олди. Испания Ички ишлар вазирлиги маълумотига кўра, 30 июль куни бир куннинг ўзида қарийб 50 минг киши Сеутага ноқонуний равишда кирган. Айрим манбаларда эса сўнгги 24 соат ичида 60 мингдан ортиқ мигрант шаҳарга етиб келгани қайд этилган.

 

Вазият юзасидан Испания Бош вазири Педро Санчес Европа Иттифоқи институтларига мурожаат юбориб, айрим давлатларнинг инқирозга муносабати юзасидан хавотир билдирган. Шу билан бирга, Франция Президенти Эммануэл Макрон Испания билан бирдамлик билдириб, Франция–Испания чегарасига қўшимча ҳарбий кучлар, самолётлар ва дронлар жойлаштирилганини маълум қилган.