Талабалар энди ётоқхонага жойлашиш учун алоҳида идораларга мурожаат қилмайди

 

1 августдан бошлаб талабалар турар жойига жойлашиш ва вақтинча рўйхатдан ўтиш жараёни соддалаштирилади. Олий таълим, фан ва инновациялар вазирлиги матбуот хизмати хабар берди.

 

Ягона интерактив давлат хизматлари портали (my.gov.uz) орқали эндиликда талабалар турар жойига жойлашиш учун ариза юбориш ҳамда вақтинча рўйхатдан ўтиш ягона композит хизмат орқали амалга оширилади.

 

Янги тартибга кўра, талабалар алоҳида ҳужжатлар тўплаши ёки вақтинча рўйхатдан ўтиш учун бошқа идораларга мурожаат қилиши шарт эмас. Талабалар my.gov.uz порталидаги "Талабалар турар жойига жойлашиш учун ариза юбориш" хизмати орқали мурожаат қилади.

 

Ариза маъқуллангач, талабага электрон шартнома ва йўлланма тақдим этилади. Шартномада белгиланган тўлов амалга оширилгач, тизим автоматик равишда вақтинча рўйхатдан ўтиш жараёнини ишга туширади. Рўйхатдан ўтиш тўлови тўланганидан сўнг талабага турган жойи бўйича вақтинча рўйхатга олингани ҳақидаги қайд варағи электрон шаклда тақдим этилади.

 

Вазирлар Маҳкамасининг 2023 йил 14 августдаги 376-сон қарорига мувофиқ, дастлаб имтиёз ва устуворликка эга талабгорлар талабалар турар жойларига жойлаштирилади. Шундан сўнг қолган ўринлар умумий навбат асосида тақсимланади. Бунда 1-босқич талабалари учун 55–65 фоиз, 2-босқич талабалари учун 15–20 фоиз, 3-босқич ва ундан юқори курс талабалари учун эса 20–25 фоизгача квота ажратилади.

 

2026/2027-ўқув йили учун аризалар 1 августдан ўқув йили якунига қадар қабул қилинади. Олий таълим муассасаларининг 1-босқичига тавсия этилган абитуриентлар эса якуний натижалар эълон қилингач мурожаат юборишлари мумкин.