Тошкентда болалар майдончаси ўрнидаги қурилиш юзасидан жиноят иши қўзғатилди
Тергов давомида бир гумонланувчи процессуал тартибда ушланган.
Тошкент шаҳрининг Миробод туманида болалар майдончаси ва спорт ўйингоҳи ўрнида амалга оширилган ноқонуний қурилиш ишлари юзасидан жиноят иши қўзғатилди.
Маълум қилинишича, жорий йилнинг 30 июль куни Миробод туманидаги ҳолат ўрганилган. Текширув давомида «Маҳалла» хайрия жамоат фонди балансида бўлган ҳудуд кейинчалик "Al-Latif Hearts Tower" МЧЖ тасарруфига ўтказилгани ҳамда реконструкция ва қўшимча бино-иншоотлар қуриш учун тегишли рухсат ҳужжатлари расмийлаштирилгани аниқланган.
Бироқ, «Лолазор» МФЙ ҳудудидаги кўп қаватли уйлар аҳолиси мазкур ҳудудда янги бино қурилишига қаршилик билдирган. Шунингдек, «Маҳалла» хайрия жамоат фонди билан инвестор ўртасида тузилган инвестиция шартномаси бекор қилинган.
Шунга қарамай, 2026 йил июнь ойида фонд балансидаги 172 квадрат метр майдондаги бино бузиб ташлангани, бунинг оқибатида давлат манфаатларига жиддий зарар етказилгани аниқланган.
Мазкур ҳолат юзасидан 2026 йил 27 июль куни Миробод тумани прокуратураси томонидан "Al-Latif Hearts Tower" МЧЖ мансабдор шахслари ҳамда бошқа шахсларга нисбатан Жиноят кодексининг тегишли моддалари билан жиноят иши қўзғатилган.
Шунингдек, жамиятнинг норасмий раҳбари сифатида кўрсатилаётган Аслиддин Икромов гумон қилинувчи тариқасида процессуал тартибда ушланган.
Ҳозирда мазкур ҳолат юзасидан тергов ҳаракатлари давом эттирилмоқда. Масъулларнинг хатти-ҳаракатларига ҳуқуқий баҳо бериш ҳамда болалар майдончасини аввалги ҳолатига қайтариш бўйича зарур чоралар кўрилаётгани билдирилди.
