Тошкентдаги қурилиш майдонида ер ўпирилиб тушди
Тошкент шаҳар ҳокимлиги ҳодиса юзасидан расмий муносабат билдириб, махсус комиссия тузилганини маълум қилди.
Ижтимоий тармоқларда Тошкент шаҳрининг Олмазор тумани, Орзу массиви 3-уй манзилида жойлашган қурилиш объекти котлованининг бир қисми ўпирилгани ҳақида хабарлар тарқалди. Хабарларда кўп йиллик дарахт қулаб электр симларини узиб юборгани, бунинг оқибатида “Орзу” маҳалласи ва унга туташ ҳудудларда электр таъминоти узилгани ҳамда бир киши жароҳатлангани айтилмоқда. Тошкент шаҳар ҳокимлиги ҳодиса юзасидан расмий муносабат билдирди.
Ҳокимлик маълумотига кўра, айни пайтда ҳодиса оқибатида жабрланганлар ёки тиббий ёрдам сўраб мурожаат қилган фуқаролар қайд этилмаган.
Қайд этилишича, вазият Тошкент шаҳар ҳокимининг шахсий назоратига олинган. Унинг топшириғи билан Тошкент шаҳар Фавқулодда вазиятлар бошқармаси, Қурилиш ва уй-жой коммунал хўжалиги соҳасини назорат қилиш инспекцияси, прокуратура органлари, Олмазор тумани ҳокимлиги ҳамда бошқа мутасадди идоралар вакилларидан иборат тезкор махсус комиссия тузилган.
Ҳозирда ҳодиса жойида фуқаролар хавфсизлигини таъминлаш, хавфли ҳудудни ўраб олиш ва унга киришни чеклаш бўйича зарур чоралар кўрилмоқда. Мутахассислар ер ўпирилишининг сабаблари, шунингдек, ёндош ҳудуд, йўл қопламаси ва муҳандислик коммуникацияларининг ҳолатини ўрганмоқда.
Ҳокимлик текширув якунларига кўра, масъул шахсларнинг ҳаракатларига ҳуқуқий баҳо берилиши, шаҳарсозлик қонунчилиги ва қурилиш меъёрларини бузган шахслар белгиланган тартибда жавобгарликка тортилишини маълум қилди.
