Андижонда оммавий муштлашув қилган 7 нафар аёл 5 суткага қамалди
Можаро Инстаграм ижтимоий тармоғида бошланган ўзаро ҳақоратлар оқибатида юзага келган.
Андижон шаҳрида бир гуруҳ аёллар ўртасида содир бўлган оммавий жанжал юзасидан суд қарори чиқарилди. Ҳодисада иштирок этган 7 нафар аёлга 5 суткадан маъмурий қамоқ жазоси тайинланди.
Вилоят Ички ишлар бошқармаси маълумотига кўра, воқеа 30 июль куни соат 12:30 атрофида Андижон шаҳридаги кўп қаватли уйлар ҳудудида содир бўлган. 102 қисқа рақамига келиб тушган мурожаат асосида воқеа жойига етиб борган ички ишлар ходимлари фуқаролар жамоат тартибини қўпол равишда бузиб, ўзаро жанжаллашаётганини аниқлаган.
Ҳуқуқий баҳо бериш мақсадида улар ички ишлар органига олиб борилган. Бироқ айрим аёллар бу ерда ҳам ходимларнинг қонуний талабларига бўйсунмай, ўзаро ҳақорат ва жанжални давом эттирган.
Терговга қадар ўтказилган текширув давомида можаро Instagram ижтимоий тармоғида бошланган ўзаро ҳақоратлар оқибатида юзага келгани аниқланган.
Тўпланган ҳужжатлар Жиноят ишлари бўйича Андижон шаҳар судига юборилган. Суд қарори билан 7 нафар аёл Маъмурий жавобгарлик тўғрисидаги кодекснинг 183-моддаси (майда безорилик) ҳамда 194-моддаси (ички ишлар органи ходимининг қонуний талабини бажармаслик) бўйича айбдор деб топилиб, уларнинг ҳар бирига 5 суткадан маъмурий қамоқ жазоси тайинланган.
