АҚШ 50 та давлат фуқаролари учун визага 20 минг долларгача депозит жорий қилади
Ўзбекистон ушбу рўйхатга киритилмаган.
АҚШ Давлат департаменти 2026 йил 3 августдан бошлаб айрим давлатлар фуқаролари учун сайёҳлик (B-2) ва бизнес (B-1) визаларини расмийлаштиришда депозит (гаров пули) тизимини доимий асосда жорий этишини маълум қилди.
Янги тартибга кўра, консуллик ходимлари виза бериш шарти сифатида мурожаатчидан 20 минг АҚШ долларигача депозит талаб қилиши мумкин. Гаров пули АҚШ ҳудудини белгиланган муддатда тарк этиш мажбуриятини таъминлаш мақсадида олинади.
Мазкур тизим илк бор 2025 йил август ойида синов тариқасида жорий этилган бўлиб, ўшанда 5 минг, 10 минг ва 15 минг долларгача депозит ундириш амалиёти қўлланган эди. Эндиликда ушбу механизм доимий тартибда амал қилади.
Давлат департаменти маълумотига кўра, янги тартиб 50 та давлат фуқароларига татбиқ этилади. Рўйхатдан асосан Африка мамлакатлари, шунингдек, Қирғизистон ва Тожикистон ўрин олган. Ўзбекистон ва Россия ушбу рўйхатга киритилмаган.
Шунингдек, АҚШ ҳукумати иммиграция назоратини кучайтиришда давом этмоқда. Аввалроқ Америка ОАВлари мамлакат аэропортларида визаси муддати ўтган хорижий фуқароларни аниқлаш ва ушлаш бўйича рейдлар ўтказилаётгани ҳақида хабар берган эди. Ички хавфсизлик департаменти бундай чоралар ноқонуний миграциянинг олдини олишга қаратилганини билдирган.
