Бухорода “ҳужра” ташкил қилиб, ноқонуний диний таълим бериб келган шахс ушланди
Шунингдек, фарзандларини мактабга юбормай, ҳужрага берган ота-оналар ҳам жазоланди.
Бухоро вилоятининг Ромитан туманида вояга етмаган болаларга ноқонуний диний таълим бериб келган шахс ҳамда бунга шароит яратган ота-оналар аниқланди. Бу ҳақда Ички ишлар вазирлиги Ахборот хизмати маълум қилди.
Қайд этилишича, жорий йилнинг 24 июль куни ҳуқуқни муҳофаза қилувчи органлар томонидан Ромитан тумани «Қалъайичорбоғ» маҳалласида ўтказилган тезкор тадбир давомида фуқаронинг ўз уйида яширин диний ҳужра ташкил этгани фош этилган.
Аниқланишича, мазкур шахс махсус диний маълумотга эга бўлмаган ҳолда вояга етмаган болаларга ноқонуний равишда диний таълим бериб, уларга турли топшириқ ва вазифалар юклаб келган.
Мазкур ҳолат юзасидан унга нисбатан Жиноят кодексининг 229-2-моддаси 2-қисми (диний таълимотдан сабоқ бериш тартибини бузиш) билан жиноят иши қўзғатилиб, тергов ҳаракатлари олиб борилмоқда.
Шунингдек, фарзандларини умумтаълим муассасаларига юбормасдан, уларнинг норасмий диний таълим олиши учун шароит яратган ота-оналарга нисбатан Маъмурий жавобгарлик тўғрисидаги кодекснинг 47-моддаси (болаларни тарбиялаш ва уларга таълим бериш мажбуриятларини бажармаслик) асосида қонуний чоралар қўлланилган.
