Фарғонада собиқ хотинига шилқимлик қилган эркак 5 суткага қамалди
Жабрланувчини ҳақорат қилган кундоши учун 2 млн сўмдан ортиқ жаримага тортилди.
Фарғона вилоятида собиқ турмуш ўртоғига нисбатан жинсий зўравонлик содир этган эркак маъмурий жавобгарликка тортилди. Шунингдек, жабрланувчини ҳақорат қилган унинг иккинчи хотини ҳам суд қарори билан жаримага тортилди.
Суд ҳужжатларига кўра, ҳодиса 2026 йил 18 апрель куни Фарғона вилояти Ўзбекистон тумани, Яйпан шаҳридаги автобус бекатида юз берган.
1991 йилда туғилган эркак собиқ турмуш ўртоғини бекатда учратиб қолиб, уни четга тортган, мажбуран қучоқлаб, ўпишга уринган. Жабрланувчининг суддаги кўрсатмасига кўра, у эркакни итариб юборган.
Шу куни кечқурун эркакнинг иккинчи хотини жабрланувчига телефон қилиб, уни ҳақорат қилган ҳамда шаъни ва қадр-қимматини камситувчи сўзлар ишлатган.
Суд мажлисида ҳар икки шахс ўз айбига иқрор бўлиб, қилмишидан пушаймон эканини билдирган ва енгилроқ жазо тайинланишини сўраган.
Суд қарорига кўра, эркак Маъмурий жавобгарлик тўғрисидаги кодекснинг 41-1-моддаси (жинсий зўравонлик) билан айбдор деб топилиб, 5 сутка маъмурий қамоқ жазосига ҳукм қилинган.
Унинг иккинчи хотини эса 41-моддаси (ҳақорат қилиш) билан айбдор деб топилиб, 5 БҲМ, яъни 2 миллион 60 минг сўм миқдорида жаримага тортилган.
