Францияда ўрмон ёнғинлари бўйича 375 киши қўлга олинди
Уларнинг 142 нафари вояга етмаганлар эканлиги маълум қилинди.
Францияда ўрмон ёнғинларига алоқадорликда гумон қилиниб, 375 киши қўлга олинди. Бу ҳақда мамлакат Ички ишлар вазирлиги маълумотларига таяниб маҳаллий ОАВ хабар берди.
Маълум қилинишича, ёз мавсуми бошидан буён ўрмон ёнғинларига алоқадорликда жами 375 нафар гумондор қўлга олинган. Уларнинг 142 нафари вояга етмаганлар экани қайд этилган.
Расмий маълумотларга кўра, қўлга олинганлардан 36 нафари қамоқ жазосига ҳукм қилинган ёки суд қарорига қадар ҳибсда сақланмоқда.
Сўнгги ҳафталарда Франциянинг Жиронда, Од ва Сена-э-Марн ҳудудларида бир нечта йирик ўрмон ёнғинлари кузатилган. Мутасаддилар айрим ёнғинлар юқори ҳарорат ва қурғоқчилик оқибатида юзага келганини, бошқалари эса инсон омили билан боғлиқ бўлиши мумкинлигини билдирмоқда.
Франция Ички ишлар вазири Лоран Нунез июль ойида қайд этилган ёнғинларнинг учдан икки қисми қасддан содир этилганини, қолганлари эса эҳтиётсизлик оқибатида юз берганини маълум қилган.
Шунингдек, ҳукумат мамлакатдаги ёнғинлар устидан назорат кучайтирилганини билдирган. Айни пайтда айрим ҳудудларда ёнғинларни бартараф этиш ишлари давом этмоқда. Европа Иттифоқи ҳам ўрмон ёнғинларига қарши курашиш учун махсус авиация ва юзлаб ўт ўчирувчиларни сафарбар қилган.
