Халқаро қидирувдаги ўзбекистонлик Дубайдан мамлакатга қайтарилди
Фирибгарликда айбланган гумонланувчи терговдан қочиб, узоқ вақт хорижда яшириниб юрган.
Интерпол ва халқаро ҳуқуқни муҳофаза қилувчи идоралар ҳамкорлигида халқаро қидирувда бўлган Ўзбекистон фуқароси Дубайдан мамлакатга қайтарилди.
Ўзбекистон Ички ишлар вазирлиги, Интерпол Миллий марказий бюроси ҳамда халқаро ҳамкорларнинг мувофиқлаштирилган саъй-ҳаракатлари натижасида халқаро қидирувда бўлган фуқаро Н.У. Бирлашган Араб Амирликларининг Дубай шаҳридан Ўзбекистонга экстрадиция қилинди.
Қайд этилишича, мазкур шахс фирибгарлик жиноятини содир этганликда айбланиб, терговдан яшириниш мақсадида Ўзбекистонни тарк этган ва узоқ вақт давомида хорижда бўлиб келган.
Тезкор ахборот алмашинуви, халқаро ҳамкорлар билан олиб борилган қўшма тадбирлар ҳамда Интерпол каналлари орқали амалга оширилган қидирув ишлари натижасида унинг яшаш жойи аниқланиб, зарур процессуал чоралар кўрилган. Шундан сўнг фуқаро Ўзбекистон Республикаси Ички ишлар вазирлиги вакили иштирокида Дубайдаги Бош консулхонада белгиланган тартибда қабул қилиниб, мамлакатга қайтарилган.
