Сеутага ноқонуний ўтишга уринган мигрантлар орасида ҳалок бўлганлар сони 72 нафарга етди
Қурбонлар орасида 20 ёшли футболчи ҳам бор.
Марокашдан Испаниянинг Сеута анклавига ноқонуний равишда ўтишга уринган минглаб мигрантлар билан боғлиқ фожиада ҳалок бўлганлар сони камида 72 нафарга етди. Бу ҳақда Reuters агентлиги хабар берди.
Маълумотларга кўра, қурбонлар орасида Марокашнинг “Мағриб Атлетико” футбол клубида тўп сурган 20 ёшли футболчи Фатен Бен Омар эл-Азиз ҳам бор.
30 июль куни бошланган оммавий миграция оқими давомида 50 мингдан ортиқ киши қуруқлик ва денгиз орқали Сеута ҳудудига киришга уринган. Айрим мигрантлар денгизда чўкиб кетган, бошқалари эса чегара тўсиқларидан ошишга уриниш чоғидаги тиқилинч оқибатида ҳалок бўлган.
Испания расмийлари сўнгги 48 соат ичида 48 мингга яқин мигрант Марокашга қайтарилганини маълум қилди. Сеута маъмурияти маълумотига кўра, ҳодисалар давомида 1 мингдан ортиқ киши тиббий ёрдам олган.
Марокаш Ички ишлар вазирлиги аввалроқ 11 нафар қурбон ҳақида маълум қилган бўлсада, кейинчалик халқаро ОАВлар ҳалок бўлганлар сони 72 нафарга етганини хабар қилди. Расмийлар қурбонлар сони ва ҳодиса тафсилотлари юзасидан текширувларни давом эттирмоқда.
