Тошкентда маст йўловчи автобус ҳайдовчисини калтаклади
У автобус ойнасини синдириб, транспортга ҳам зарар етказган.
Тошкент шаҳрида маст ҳолатдаги йўловчи автобус салонида жанжал кўтариб, транспорт воситасининг олд ойнасини синдирди ҳамда ҳайдовчига ҳужум қилди. Бу ҳақда Тошкент шаҳар ИИББ хабар берди.
Маълум қилинишича, ҳодиса жорий йил 1 август куни соат 14:30 атрофида 98-йўналишда ҳаракатланаётган автобусда содир бўлган.
Дастлабки маълумотларга кўра, муқаддам судланган, 1982 йилда туғилган Д.П. маст ҳолатда автобус салонида жамоат тартибини бузиб, ҳайдовчининг фаолиятига тўсқинлик қилган ва жанжал чиқарган.
Ҳайдовчи — 1988 йилда туғилган Р.Я. ҳуқуқбузарни автобусдан тушираётган вақтда, йўловчи автобуснинг олд ойнасига мушт билан зарба бериб, уни синдирган.
Шундан сўнг, Д.П. ҳайдовчининг бўйин ва юз қисмига бир неча марта уриб, унга тан жароҳати етказган.
Мазкур ҳолат юзасидан Чилонзор тумани Ички ишлар органлари томонидан терговга қадар текширув ўтказилмоқда. Якунига кўра, қонуний қарор қабул қилиниши маълум қилинди.
