Тошкентда яна бир йўналишда “Яшил тўлқин” светофор тизими ишга туширилди

 

Тошкент шаҳрида транспорт ҳаракатини самарали ташкил этиш мақсадида “Яшил тўлқин” тизимини босқичма-босқич жорий этиш ишлари давом этмоқда. Марказий йўл ҳаракатини бошқариш маркази матбуот хизмати хабар берди.

 

Йўл ҳаракатини ташкил этиш маркази мутахассислари Кичик ҳалқа автомобиль йўлининг Боғибустон кўчаси билан кесишмасидан «Чилонзор» метро бекатигача бўлган 1,7 километрлик йўналишдаги 5 та светофорнинг иш режимини ҳисоблаб чиқиб, уларни ўзаро синхронлаштирди.

 

Мазкур йўналишда илк бор “Яшил тўлқин” тизими сутка давомида ҳар икки йўналишда бир вақтнинг ўзида ишлайдиган тартибда йўлга қўйилди. Бунга ушбу йўлда транспорт оқимининг икки томонда ҳам деярли тенг бўлиши имкон яратди.

 

Ҳисоб-китобларга кўра, тизим жорий этилишидан аввал ушбу йўл қисмини босиб ўтиш учун ўртача 5 дақиқа вақт талаб этилган бўлса, ҳозирда бу кўрсаткич 2 дақиқа 45 сониягача қисқарди. Натижада ҳаракатланиш вақти қарийб 45 фоизга камайган.

 

Қайд этилишича, ҳайдовчилар белгиланган 40–60 км/соат тезликка амал қилган ҳолда ҳаракатланса, чорраҳаларда светофорнинг қизил чироғида тўхтамасдан йўлни узлуксиз босиб ўтиши мумкин.

 

Ҳозирги кунга қадар “Яшил тўлқин” тизими пойтахтнинг умумий узунлиги 5,7 километр бўлган икки йўл қисмидаги 18 та тартибга солинадиган чорраҳани қамраб олган. Ушбу йўналишларда транспорт воситаларининг ҳаракатланиш вақти ўртача 30 фоизга қисқарган.

 

Аввалроқ Марказ «Яшил тўлқин» тизимининг дастлабки босқичини Буюк Ипак Йўли кўчасининг «Тўра Бува» масжидидан Салом кўчасигача бўлган қисмида ишга туширган эди. Мазкур йўналишдаги 13 та чорраҳада светофорлар фаолияти ўзаро синхронлаштирилган.

 

Йўл ҳаракатини ташкил этиш маркази томонидан Тошкентнинг бошқа кўчаларида ҳам “Яшил тўлқин” тизимини жорий этиш бўйича ҳисоб-китоб ва созлаш ишлари давом эттирилмоқда.