Тошкентдаги 9 қаватли уй ёнидаги котлован ўпирилиши бўйича жиноят иши қўзғатилди
Ҳодиса оқибатида бир нафар фуқаро тан жароҳати олиб, шифохонага ётқизилган.
Тошкент шаҳрининг Олмазор туманида кўп қаватли уй яқинида қурилиш ишлари давомида котлован ўпирилиши юзасидан жиноят иши қўзғатилди.
Маълум қилинишича, ҳодиса 2 август куни Орзу массиви, 3-уй манзилида жойлашган қурилиш объектида содир бўлган. Дастлабки маълумотларга кўра, меҳмонхона қурилиши учун котлован қазиш ишлари олиб борилаётган вақтда пудрат ташкилоти эҳтиётсизлиги оқибатида котлован чети ўпирилган.
Ҳодиса оқибатида электр кабелига шикаст етган ва ёнғин юзага келган. Шунингдек, бир нафар фуқаро тан жароҳати олиб, шифохонага ётқизилган. Ҳозирда унинг даволаниши давом этмоқда.
Бош прокуратура маълумотига кўра, ҳолат юзасидан масъул МЧЖ мансабдор шахсларининг ҳаракатларида Жиноят кодексининг 257-моддаси (меҳнатни муҳофаза қилиш қоидаларини бузиш) ҳамда 192-11-моддаси (нодавлат ташкилот мансабдор шахслари томонидан ваколатларни суиистеъмол қилиш) аломатлари мавжудлиги сабабли жиноят иши қўзғатилган.
Айни пайтда ҳодиса юзасидан тергов ҳаракатлари олиб борилмоқда. Мутасаддиларнинг хатти-ҳаракатларига ҳуқуқий баҳо берилиб, қурилиш меъёрлари ва шаҳарсозлик талаблари бузилишига йўл қўйган шахсларга нисбатан қонунчиликда белгиланган тартибда чоралар кўрилиши маълум қилинди.
