Ўзбекистон мактаб ва ОТМларида хавфсизликнинг янги тартиби жорий этилади

Вазирлар Маҳкамасининг 2026 йил 31 июлдаги 425-сон қарори билан давлат таълим муассасалари, нодавлат таълим ташкилотлари ҳамда хорижий давлатлар таълим ташкилотлари филиалларининг хавфсизлигини таъминлашнинг янги тартиби тасдиқланди. Ҳужжат таълим муассасаларида хавфсизлик тизимини замонавий талаблар асосида ташкил этиш ва ўқувчилар, талабалар ҳамда педагоглар хавфсизлигини кучайтиришга қаратилган.

Қарорга мувофиқ, таълим муассасаларининг асосий кириш жойларида назорат-ўтказиш пунктлари ҳамда замонавий кириш-чиқишни назорат қилиш тизимлари ташкил этилади. Кириш ва чиқиш ҳақидаги маълумотлар электрон тарзда қайд этилиб, камида уч ой давомида сақланади. Шунингдек, ҳудудга кириш биометрик идентификация, бармоқ изи, кўз гавҳари ёки қонунчиликда рухсат этилган бошқа идентификаторлар орқали амалга оширилиши мумкин. Барча кириш-чиқишлар электрон журналга киритилади.

Янги низомга кўра, таълим муассасалари ҳудудига бегона шахсларнинг рухсатсиз киришига йўл қўйилмайди. Ташриф буюрувчилар белгиланган тартиб асосида рўйхатдан ўтказилиб, уларнинг кириб-чиқиши назорат қилинади. Шу билан бирга, мактаблар, академик лицейлар, коллежлар, техникумлар ва олий таълим муассасаларининг асосий кириш жойлари, назорат-ўтказиш пунктлари, йўлаклар, ошхоналар, спорт майдонлари ҳамда бошқа муҳим ҳудудлари замонавий видеокузатув камералари билан жиҳозланади. Видеоёзувлар камида бир ой давомида сақланиши белгиланган.

Ҳужжатда фавқулодда вазиятларда тезкор хабар бериш, қўриқлаш сигнализацияси ва бошқа хавфсизлик тизимларини жорий этиш ҳам назарда тутилган. Шунингдек, таълим муассасалари хавфсизлигини таъминлаш бўйича масъул ходимларнинг вазифалари, техник воситаларга қўйиладиган талаблар ҳамда ички хавфсизлик тартиблари аниқ белгилаб берилган.