Қирғизистонда одам жасадини куйдириш тақиқланди
Крематорийлардан фақат тиббий биологик чиқиндиларни йўқ қилиш мақсадида фойдаланишга рухсат этилди.
Қирғизистон президенти Садир Жапаров “Дафн этиш ва дафн ишлари тўғрисида”ги қонунга киритилган ўзгартишларни имзолади. Мазкур ҳужжатга мувофиқ, мамлакат ҳудудида вафот этган шахсларнинг жасадини куйдириш (кремация) расман тақиқланди. Бу ҳақда 24.kg нашри хабар берди.
Янги тартибга кўра, крематорийлардан фақат тиббий фаолият натижасида ҳосил бўладиган биологик материаллар — инсон аъзолари ва тўқималарини санитария мақсадида термик йўқ қилиш учун фойдаланишга рухсат этилади.
Қонунга киритилган ўзгартишлар билан кремация, хокдонлар, колумбарийлар ва мотам деворларига оид нормалар бекор қилинган. Эндиликда фуқаролар, шунингдек шахси аниқланмаган марҳумлар фақат қабристонларда ерга дафн этилиши белгиланган.
Шунингдек, крематорийлардан аборт қилинган ҳамда ўлик туғилган ҳомилаларни куйдириш учун фойдаланиш ҳам тақиқланган.
Янги қонун расмий эълон қилинганидан сўнг 10 кун ўтиб кучга киради.
