“Исроил билан музокаралар фақат хўрликка олиб келади” – Ҳизбуллоҳ
Исроил қўшинлари Ливан ҳудудини тарк этмагунча ва ҳужумлар тўхтамагунча музокаралар бўлмаслиги билдирилди.
«Ҳизбуллоҳ» бош котиби Шайх Наим Қосим Исроил билан музокаралар Ливанга ҳеч қандай фойда келтирмаслигини билдириб, бундай мулоқот фақат босим ва хўрликка олиб келишини маълум қилди. Унинг айтишича, Исроил Ливан ҳудудидаги ҳарбий амалиётларини давом эттирар экан, музокаралар учун зарур шарт-шароит мавжуд эмас. Бу ҳақда Таsnim хабар берди.
"Сионистик режим билан музокаралар хўрликдан бошқа нарса келтирмайди", деган Шайх Наим Қосим.
Унинг таъкидлашича, аввало Исроил Ливан ҳудудидан ўз қўшинларини олиб чиқиши, ҳужумларни тўхтатиши ҳамда мамлакат суверенитетини ҳурмат қилиши лозим. Шундан кейингина мавжуд муаммоларни ҳал этишнинг бошқа йўллари муҳокама қилиниши мумкин.
Наим Қосим Ливан ҳукумати ва халқини ташқи босимларга ён бермасликка чақирган. Унинг сўзларига кўра, Исроилнинг ҳарбий босими остида қабул қилинадиган ҳар қандай қарор Ливан манфаатларига зид бўлади ва мамлакатнинг мустақиллигига путур етказади.
«Ҳизбуллоҳ» етакчиси қаршилик ҳаракати Ливан хавфсизлигини таъминлашда муҳим роль ўйнаётганини таъкидлаб, ташкилот мамлакат ҳудуди ва халқини ҳимоя қилишни давом эттиришини билдирган. У Ливан ичидаги бирликни сақлаш ва ташқи таҳдидларга қарши умумий позицияни мустаҳкамлаш зарурлигини ҳам қайд этган.
