Президент Администрациясининг ҳуқуқий мақоми белгиланмоқда
Конституциявий қонун лойиҳаси Президент Администрацияси мансабдор ва хизматчи ходимлари фаолиятининг ҳуқуқий кафолатларини ҳам мустаҳкамлайди.
Олий Мажлис Қонунчилик палатасининг навбатдаги мажлисида “Ўзбекистон Республикаси Президенти Администрацияси тўғрисида”ги Конституциявий қонун лойиҳаси биринчи ўқишда қабул қилинди.
Қонун лойиҳаси Президент Администрациясининг давлат бошқаруви тизимидаги ўрни, ҳуқуқий мақоми ҳамда фаолиятининг асосий йўналишларини конституциявий қонун даражасида белгилашга қаратилган.
Лойиҳага мувофиқ, Президент Администрацияси Ўзбекистон Республикаси Президенти томонидан шакллантирилади. Шунингдек, Администрацияга Президент томонидан лавозимга тайинланадиган ва лавозимидан озод этиладиган Администрация раҳбари бошчилик қилиши назарда тутилмоқда.
Ҳужжатда Президент Администрациясининг ҳуқуқий мақоми, фаолиятининг асосий принциплари, таркибий тузилмаси ва иш фаолиятини ташкил этиш тартиби, давлат ҳокимияти органлари ҳамда бошқа ташкилотлар билан ўзаро ҳамкорлик механизмлари аниқ белгилаб берилмоқда.
Шунингдек, қонун лойиҳасида Президент Администрацияси мансабдор шахслари, бошқарув ва хизмат кўрсатувчи ходимлари фаолиятининг ҳуқуқий кафолатларини мустаҳкамлаш ҳам кўзда тутилган.
