Сурхондарёда қарийб 100 йиллик 11 туп арча ноқонуний қўпорилди
Дарахтларни қўпориш ишлари экология ходимларининг огоҳлантиришларига қарамай амалга оширилгани билдирилди.
Экология миллий қўмитаси Сурхондарё вилоятининг Сариосиё тумани Цангардак маҳалласидаги Узун ўрмон хўжалигига қарашли ҳудудда дарахтларни қўпориш ва уларга шикаст етказиш ҳолати юзасидан расмий муносабат билдирди.
Маълум қилинишича, ҳодиса юзасидан Экология миллий қўмитаси Экополицияси, Бош прокуратура, Сурхондарё вилояти ҳокимлиги ҳамда экология ҳудудий бошқармаси вакилларидан иборат ишчи гуруҳ томонидан ўрганиш ишлари олиб борилмоқда.
Дастлабки маълумотларга кўра, мазкур ишлар ҳеч қандай рухсатномасиз, экология ходимларининг огоҳлантиришларига қарамай амалга оширилган.
Ўрганишлар давомида дарахтларга етказилган экологик зарар миқдори, қурилиш ишларининг амалдаги экологик қонунчилик талабларига мувофиқлиги ҳамда айбдор шахсларнинг жавобгарлиги юзасидан ҳуқуқий баҳо берилади.
Дастлабки ҳисоб-китобларга кўра, ҳудудда қарийб 100 йиллик 11 туп Зарафшон арчаси қўпорилгани аниқланган.
Текширув якунлари бўйича ҳуқуқбузарларга нисбатан амалдаги қонунчилик асосида қатъий чоралар кўрилиши, натижалар юзасидан жамоатчиликка қўшимча маълумот берилиши маълум қилинди.
