Тошкентда икки йўловчи автобуси тўқнашди, бир йўловчи жароҳатланди
Жабрланувчи автобус ҳайдовчиси томонидан тез тиббий ёрдам машинасида Тошкент давлат тиббиёт университети стоматология клиникасига етказилган.
«Тошшаҳартрансхизмат» АЖ 2 ва 18-автобус саройларига қарашли автобуслар иштирокида содир бўлган йўл-транспорт ҳодисаси юзасидан расмий муносабат билдирди.
Маълум қилинишича, ҳодиса 2026 йил 2 август куни соат 08:10 атрофида Юнусобод тумани Амир Темур шоҳ кўчасида юз берган.
Дастлабки маълумотларга кўра, 17-сонли йўналишда ҳаракатланаётган «Yutong» газ русумли автобус ҳайдовчиси эҳтиётсизлик оқибатида «Юлдуз» бекатида тўхтаб турган 85-сонли йўналишдаги «Yutong» электробусининг орқа қисмига урилган.
Йўл-транспорт ҳодисаси оқибатида газ автобусидаги бир нафар йўловчи тан жароҳати олган.
Жабрланувчи автобус ҳайдовчиси томонидан тез тиббий ёрдам машинасида Тошкент давлат тиббиёт университети стоматология клиникасига етказилган. Унга зарур тиббий ёрдам кўрсатилгач, уйига жавоб берилган.
Ҳодиса оқибатида шикастланган ҳар икки автобусни қайта йўналишга чиқариш учун таъмирлаш ишлари олиб борилмоқда.
Мазкур йўл-транспорт ҳодисаси Тошкент шаҳар ИИББ ЙҲХБ ходимлари томонидан белгиланган тартибда расмийлаштирилган.
