Тошкентда «кешбэк» тизими орқали 4,7 млрд сўмлик буджет маблағи талон-торож қилинди
Масъуллар компьютер техникаси орқали гўёки 76,2 миллиард сўмлик маҳсулот реализация қилингани ҳақида сохта маълумотларни расмийлаштирган.
Бош прокуратура ҳузуридаги Департаментнинг Тошкент шаҳар бошқармаси Солиқ қўмитаси билан ҳамкорликда ўтказган терговга қадар текширувда «Г.М.» МЧЖ мансабдор шахслари томонидан “Soliq Mobile” иловасидаги «кешбэк» тизимидан ноқонуний фойдаланиш ҳолати фош этилди.
Аниқланишича, масъуллар компьютер техникаси ёрдамида гўёки 76,2 миллиард сўмлик маҳсулот реализация қилингани ҳақида сохта маълумотлар расмийлаштирган. Шунингдек, назорат-касса машиналари орқали қалбаки харид чеклари шакллантирилиб, улар Телеграм орқали 2 475 нафар Ижтимоий ҳимоя реестрига киритилган фуқарога 70–150 минг сўмдан сотилган.
Натижада “Soliq Mobile” иловаси орқали 7,5 миллиард сўм кешбек ҳисобланган, шундан 4,1 миллиард сўми буджет маблағлари ҳисобидан ноқонуний тўлаб берилгани аниқланган.
Шу билан бирга, Департаментнинг Чилонзор туман бўлими ва Солиқ қўмитаси ҳамкорлигида ўтказилган текширувда «E.G.» ҳамда «I.F.» МЧЖ масъуллари ўзаро тил бириктириб, 10 миллиард сўмлик маҳсулот реализацияси юзасидан сохта маълумотлар расмийлаштиргани маълум бўлди.
Улар қалбаки харид чекларининг 1 812 нафар фуқаро номига расмийлаштирилишини таъминлаб, “Солиқ Мобиле” иловаси орқали 1 миллиард сўм кешбек ҳисоблатган, шундан 640,8 миллион сўми ноқонуний равишда буджет маблағлари ҳисобидан тўлаб берилган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 228-моддаси (ҳужжатларни қалбакилаштириш ва улардан фойдаланиш) билан жиноят ишлари қўзғатилиб, тергов ҳаракатлари олиб борилмоқда.
