Тошкентда ноқонуний уй бузилиши ва қурилиши юзасидан жиноят иши қўзғатилди
Тегишли рухсатномасиз 20, 19, 12 ва 2 қаватли турар жой бинолари ўзбошимчалик билан қурилгани аниқланди.
Тошкент шаҳар прокуратураси “New Port” турар жой мажмуаси билан боғлиқ ҳолат юзасидан расмий муносабат билдирди.
Маълум қилинишича, жорий йилнинг 2 август куни ижтимоий тармоқларда “New Port” турар жой мажмуаси мансабдор шахслари томонидан Яккасарой тумани, Дамариқ МФЙ, Абдулла Қаҳҳор кўчаси, 19-уйда яшовчи фуқароларга компенсация пуллари тўлиқ тўланмаётгани ҳамда уй ноқонуний бузилаётгани ҳақида видеомурожаат тарқалган.
Терговга қадар ўтказилган текширув давомида “Mega Logistics Service” МЧЖ мансабдор шахслари ушбу манзилдаги фуқароларни мажбурий кўчириш бўйича ижро ҳаракатлари якунланмаган бўлишига қарамай, уйни ўзбошимчалик билан бузиб ташлагани аниқланган.
Шунингдек, компания тегишли рухсатнома олмасдан ҳудудда бир дона 20 қаватли, икки дона 19 қаватли, бир дона 12 қаватли ҳамда бир дона 2 қаватли турар жой биноларини ўзбошимчалик билан қурилгани маълум бўлган.
Текширув якунларига кўра, “Mega Logistics Service” МЧЖ мансабдор шахслари ва бошқаларга нисбатан жиноят иши қўзғатилди. Ҳозирда Тошкент шаҳар прокуратураси томонидан дастлабки тергов ҳаракатлари олиб борилмоқда.
Қайд этилишича, мазкур жиноят иши тергови алоҳида назоратга олинган бўлиб, якунлари бўйича қонуний қарор қабул қилиниши таъминланади.
