Ўзбекистонда айрим қоидабузарликлар учун автомобиль 1 йилгача олиб қўйилиши мумкин
Депутатлар автомобилни вақтинча олиб қўйишни назарда тутувчи қонун лойиҳасини биринчи ўқишда қабул қилди.
Олий Мажлис Қонунчилик палатаси депутатлари маъмурий жазонинг янги тури — автомототранспорт воситасини 6 ойдан 1 йилгача муддатга вақтинча олиб қўйишни назарда тутувчи қонун лойиҳасини биринчи ўқишда қабул қилди.
Қонун лойиҳаси йўл-транспорт ҳодисаларининг олдини олиш, йўл ҳаракати иштирокчиларининг ҳаёти ва соғлиғини ҳимоя қилиш ҳамда қўпол қоидабузарликлар учун жавобгарликни кучайтириш мақсадида ишлаб чиқилган.
Ҳужжат билан Жиноят кодекси, Жиноят-процессуал кодекси, Маъмурий жавобгарлик тўғрисидаги кодекс ҳамда “Йўл ҳаракати тўғрисида”ги қонунга тегишли ўзгартириш ва қўшимчалар киритилиши назарда тутилмоқда.
Лойиҳага кўра, вояга етмаган шахсга транспорт воситасини бошқаришни топшириш оқибатида оғир тан жароҳати ёки ўлим юз берса, транспорт воситасини топширган шахс учун жиноий жавобгарлик белгиланади.
Шунингдек, вояга етмаганларга транспорт бошқарувини топшириш, ноқонуний пойгалар ташкил этиш ва уларда иштирок этиш, тезликни 80 км/соатдан ортиқ ошириш, юк транспортини тунги вақтда хавфли ҳолатда қолдириш каби қоидабузарликлар учун жавобгарликни кучайтириш таклиф қилинмоқда.
Бундан ташқари, йўл безорилиги, ноқонуний пойга ташкил этиш, транспорт воситасини маст ҳолда бошқариш ёки тиббий текширувдан бош тортиш ҳолатлари транспорт воситасини бошқариш ҳуқуқига эга бўлмаган ёки ушбу ҳуқуқдан маҳрум этилган шахслар томонидан содир этилганда, автомобилни 6 ойдан 1 йилгача вақтинча олиб қўйиш жазоси қўлланиши мумкин.
Мазкур жазо чораси қонунда белгиланган ҳолларда туман ёки шаҳар судлари томонидан тайинланади.
