Ўзбекистонда имтиёзли транспорт чиптаси учун қоғоз талонлар бекор қилинади
Ўн бир тоифадаги фуқароларга чипта харид қилиш учун ИД-карта ёки биометрик паспортни тақдим этиш кифоя қилади.
Президент Шавкат Мирзиёевга имтиёзли транспорт хизматларидан фойдаланиш тартибини соддалаштириш ва уларни рақамлаштиришга қаратилган таклифлар тақдим этилди.
Таклифларга кўра, 11 тоифадаги фуқаролар ҳаво, темир йўл ва шаҳарлараро транспортда бепул ёки 50 фоизлик чегирма асосида қатнайди. Бунда қоғоз талонлар бекор қилиниб, чипта харид қилиш учун IB-карта ёки биометрик паспортни тақдим этишнинг ўзи кифоя қилади. Имтиёз ҳуқуқи “Ягона миллий ижтимоий ҳимоя” ахборот тизими орқали текширилади.
Шунингдек, 2027 йил 1 январдан имтиёзли авиа, темир йўл ва шаҳарлараро автобус чипталарини «Барака» ижтимоий карта мобил иловаси орқали онлайн харид қилиш имконияти яратилади.
Маълумотларга кўра, ҳозирда 1941–1945 йиллардаги уруш ногиронлари ва қатнашчилари, уларга тенглаштирилган шахслар ҳамда Чернобил АЭСдаги авария оқибатларини бартараф этишда иштирок этган 48,4 мингдан ортиқ фуқаро транспорт имтиёзларидан фойдаланиш ҳуқуқига эга. 2025 йилда улар ушбу хизматлардан 1,7 миллион марта фойдаланган.
Президент тақдим этилган таклифларни маъқуллаб, янги хизматларни ҳудудларда сифатли йўлга қўйиш ва уларнинг ижросини қатъий назорат қилиш бўйича топшириқлар берди.
