Жанубий Кореяда жазирама оқибатида 16 киши ҳалок бўлди
Мамлакат жануби-шарқида ҳаво ҳарорати 42,5 даражани ташкил этиб, 122 йиллик метеорологик кузатувлар тарихидаги энг юқори кўрсаткич қайд этилган.
Жанубий Кореяда давом этаётган рекорд даражадаги жазирама оқибатида ҳалок бўлганлар сони 16 нафарга етди. Мамлакат президенти Ли Же Мён ҳукумат ва маҳаллий ҳокимият органларига экстремал иссиқдан зарар кўраётган аҳолини қўллаб-қувватлаш чораларини кучайтириш, шунингдек, фавқулодда вазиятларга жавоб бериш тизимини такомиллаштириш бўйича топшириқлар берди. Бу ҳақда Reuters хабар берди.
Президентнинг таъкидлашича, экстремал об-ҳаво ҳодисалари тобора тез-тез кузатилмоқда ва мавжуд инқирозга қарши кураш тизими янги иқлим шароитларига мослаштирилиши зарур. У, айниқса, кексалар, очиқ ҳавода ишловчилар ва бошқа хавф гуруҳларига мансуб фуқароларни ҳимоя қилиш бўйича қўшимча чоралар кўришни талаб қилган.
Жанубий Корея Метеорология бошқармаси маълумотларига кўра, мамлакат жануби-шарқидаги Янсан шаҳрида ҳаво ҳарорати 42,5 даражани ташкил этиб, 122 йиллик метеорологик кузатувлар тарихидаги энг юқори кўрсаткич қайд этилган. Шунингдек, тарихда илк бор Сеул ва Кёнгги провинциясининг айрим ҳудудларида энг юқори даражадаги жазирама огоҳлантируви эълон қилиниб, кейинчалик у бутун пойтахт ҳудудига кенгайтирилган.
Кучли иссиқ электр энергияси истеъмолининг кескин ошишига ҳам сабаб бўлган. Ҳукумат электр тармоқлари узлуксиз ишлашини таъминлаш, совутиш марказлари фаолиятини кенгайтириш ва аҳолига ичимлик суви ҳамда бошқа зарур воситаларни етказиб бериш бўйича фавқулодда чораларни ишга туширган.
