Ҳамас қуролсизлантирилмагунча Исроил Ғазони тарк этмайди — Нетаняху
Исроил Бош вазири Ғазодаги Исроил ҳарбийлари мамлакат хавфсизлигини таъминлаш учун барча зарур чораларни кўриш бўйича топшириқ олганини айтди.
Исроил Бош вазири Бенямин Нетаняху Ҳамас ҳаракати тўлиқ қуролсизлантирилмагунча Исроил Ғазо секторидаги ҳарбий позицияларини тарк этмаслигини маълум қилди.
Унинг сўзларига кўра, Исроил хавфсизлик манфаатларини ҳимоя қилиш масаласида қатъий позицияда қолади. Шу боис, Ҳамас қуролсизлантирилмагунча Исроил қўшинлари Ғазо секторидаги амалдаги ҳарбий чизиқлардан чекинмайди.
Нетаняху АҚШ томонидан Ғазони қуролсизлантириш бўйича таклифлар тақдим этилганини, бироқ Исроил айрим бандлар юзасидан ўз эътироз ва таклифларини билдирганини қайд этган.
Бош вазирнинг таъкидлашича, Ғазо секторида хизмат қилаётган Исроил ҳарбийлари мамлакат ҳудуди ва фуқароларини ҳимоя қилиш учун барча зарур чораларни кўриш бўйича топшириқ олган.
Аввалроқ Исроил расмийлари Ҳамаснинг тўлиқ қуролсизлантирилиши ҳамда Ғазо секторининг демилитаризация қилиниши ҳар қандай сиёсий жараён ва келишувнинг асосий шарти эканини маълум қилганди.
