Эрон билан музокаралар яхши ўтди — Трамп

 

АҚШ президенти Доналд Трамп АҚШ ва Эрон вакиллари ўртасида ўтказилган музокараларни ижобий баҳолаб, томонлар ўртасидаги мулоқот давомида сезиларли ютуқларга эришилганини маълум қилди.

 

Унинг сўзларига кўра, музокаралар самарали ўтган ва уларнинг натижалари яқин 48 соат ичида маълум бўлиши мумкин. Трамп Эрон билан келишувга эришиш оқилона қарор бўлишини таъкидлаб, воқеалар ривожини кузатиш зарурлигини қайд этган.

 

АҚШ президенти, шунингдек, музокараларда Ҳормуз бўғози орқали халқаро юк ташувларини тиклаш ҳамда Эроннинг ядровий дастурига оид масалалар муҳокама қилинаётганини билдирган. Унинг айтишича, биринчи босқичда бўғоз фаолиятини тиклаш, кейинги босқичда эса Эроннинг ядровий дастурига оид масалаларни муҳокама қилиш режалаштирилган.

 

Айни пайтда Эрон Ташқи ишлар вазирлиги АҚШ билан расмий музокаралар олиб борилаётганини рад этиб, фақат Уммон воситачилигида Ҳормуз бўғозида кемалар ҳаракати хавфсизлиги юзасидан маслаҳатлашувлар давом этаётганини маълум қилган.