“Менинг маошим 4 миллион евро эмас” — Фабио Каннаваро
Ўзбекистон МТЖ бош мураббийи ўзи ҳақидаги нотўғри маълумотлар тарқатилаётганини ва улар ҳақиқатга мос эмаслигини таъкидлади.
Ўзбекистон миллий терма жамоаси бош мураббийи Фабио Каннаваро ўзининг йиллик маоши 4 миллион евро экани ҳақидаги хабарларни рад этди.
Матбуот анжуманида сўзга чиққан мутахассиснинг таъкидлашича, Ўзбекистон футбол ассоциацияси билан тузилган келишувга кўра, у ўзи жалб қилган мутахассисларнинг иш ҳақини шахсий маблағлари ҳисобидан тўламоқда.
Каннаваронинг маълум қилишича, ҳужумчилар билан ишловчи мураббий Роландо Бянки терма жамоада бепул фаолият юритмоқда. Шунингдек, физиотерапевт Симоне Сиджилё Италиянинг Палермо клубидаги фаолиятини тарк этиб, аввалги маошининг атиги 20 фоизига ишлашга рози бўлган.
Мураббий, шунингдек, сўнгги вақтларда ўзи ҳақидаги бир қатор ҳақиқатга тўғри келмайдиган маълумотлар тарқатилаётганини билдириб, терма жамоа ичида маълумотларни ташқарига сиздираётган шахс борлигини ҳам қайд этди.
