Ногиронлиги бўлган абитуриентларга кириш имтиҳонларида қўшимча вақт берилади
Шунингдек, улар имтиҳонларда Брайл алифбоси, аудио ва электрон форматдаги материаллардан фойдаланиш имкониятига эга бўлади.
2027/2028-ўқув йилидан бошлаб ногиронлиги бўлган абитуриентлар учун олий таълим муассасаларига кириш имтиҳонлари, педагог кадрларни аттестациядан ўтказиш ҳамда миллий сертификат олиш имтиҳонларида қўшимча қулайликлар яратилади. Бу ҳақда Адлия вазирлиги хабар берди.
Унга кўра, мазкур тоифадаги талабгорларга белгиланган имтиҳон вақти меъёрининг 50 фоизи миқдорида қўшимча вақт ажратилади. Шунингдек, имтиҳон материалларидан Брайл алифбоси, аудио ва электрон форматларда фойдаланиш имконияти яратилади.
Қарорга асосан, 2026/2027-ўқув йилидан алоҳида таълим эҳтиёжига эга болалар учун ихтисослаштирилган давлат таълим муассасаларида ўқитиш индивидуал таълим режалари асосида ташкил этилади.
Бундан ташқари, 2026 йил 1-центабрдан коррекцион синф ташкил этган ҳолда умумий ўрта таълим хизматларини кўрсатувчи нодавлат таълим ташкилотларига ушбу синфларда таълим олаётган ҳар бир ўқувчи учун субсидия ажратилади. Унга кўра, Тошкент шаҳрида БҲМнинг 11 баравари, вилоятлар марказлари ва Нукус шаҳрида БҲМнинг 9,5 баравари, бошқа туман ва шаҳарларда эса БҲМнинг 8,5 баравари миқдорида субсидия тўланади. 2027 йил 1 майдан эса алоҳида таълим эҳтиёжига эга болаларни ваучер асосида замонавий ассистив (ёрдамчи) воситалар билан таъминлаш тизими жорий этилади.
