Олимлар ер аҳолиси икки бараварга қисқартиришни таклиф қилди

 

Халқаро олимлар гуруҳи Ер аҳолиси сонини 2200 йилга қадар босқичма-босқич икки бараварга, яъни тахминан 4 миллиард кишигача камайтириш таклифини илгари сурди. Бу ҳақдаги тадқиқот Sustainable Development илмий журналида эълон қилинди.

 

Тадқиқот муаллифларининг таъкидлашича, сўнгги бир асрда дунё аҳолиси 2 миллиарддан кам кўрсаткичдан 8,3 миллиард нафарга етган ва бундай ўсиш табиий ресурсларга босимни кескин кучайтирган.

 

Олимлар таклиф қилаётган ёндашув мажбурий чораларни эмас, балки оилани режалаштириш имкониятларини кенгайтириш, айниқса кам даромадли мамлакатларда аёлларнинг репродуктив саломатлик хизматларидан фойдаланишини яхшилаш орқали туғилиш суръатларини табиий равишда пасайтиришни назарда тутади.

 

Тадқиқотчилар фикрича, инсониятнинг сайёрага умумий таъсири ҳар бир инсоннинг атроф-муҳитга кўрсатадиган таъсири ҳамда Ер аҳолиси сони кўпайтмаси билан белгиланади. Шу боис, глобал аҳоли сонининг ортиб бориши экологик ва ресурслар билан боғлиқ муаммоларни янада кучайтираётгани қайд этилган. Мутахассислар прогнозига кўра, агар мавжуд тенденция сақланиб қолса, 2100 йилга бориб Ер аҳолиси сони 11,4 миллиард нафарга етиши мумкин.

 

Тадқиқотда келтирилишича, сўнгги 50 йил давомида атмосферага чиқарилган карбонат ангидрид (СО₂) ҳажми икки баравардан кўпроққа ошган. Шу даврда глобал биологик хилма-хиллик икки баравардан ортиқ қисқарган, энергия истеъмоли эса қарийб уч баравар кўпайган. Бундан ташқари, табиий ресурсларни қазиб олиш ва пестицидлардан фойдаланиш ҳажми ҳам тўрт баравардан кўпроққа ошгани қайд этилган. Мутахассислар ушбу омиллар сайёра ресурсларига босимни янада кучайтираётганини таъкидлаган.

 

Тадқиқот муаллифлари бундай ёндашув табиий экотизимларни тиклаш, биологик хилма-хилликни сақлаш, иссиқхона газлари чиқиндиларини камайтириш, ресурслар учун рақобатни юмшатиш ҳамда глобал қашшоқликни қисқартиришга хизмат қилиши мумкинлигини қайд этган.