Россиянинг Киевга ҳужумлари оқибатида 15 киши ҳалок бўлди
Киев вилоятидаги ҳужумларда Бровари, Буча ва Фастив туманлари энг кўп зарар кўрган ҳудудлар сифатида қайд этилди.
Россия армияси томонидан Киев шаҳри ва Киев вилоятига баллистик ракеталар ҳамда дронлар ёрдамида амалга оширилган кенг кўламли ҳужумлар оқибатида камида 15 киши ҳалок бўлди, 48 киши эса турли даражада тан жароҳати олди.
Украина Фавқулодда вазиятлар давлат хизмати маълумотларига кўра, Киев вилоятида 14 нафар тинч аҳоли ҳалок бўлган. Энг кўп қурбон Бровари туманида қайд этилиб, у ерда 9 киши вафот этган. Буча туманида 4 нафар, Фастив туманида эса 1 нафар фуқаро ҳалок бўлган.
Вилоятда 22 киши жароҳат олган бўлиб, Бровари туманида 12 нафар, Буча туманида 7 нафар ва Фастив туманида 3 нафар фуқаро тиббий ёрдамга муҳтож бўлган.
Киев шаҳрининг Голосевский, Оболонский, Деснянский ва Святошинский туманларида ҳам зарбалар оқибатлари қайд этилди. Турар жой бинолари, омборхоналар, логистика марказлари ва бошқа фуқаролик инфратузилмаси зарар кўрди, бир нечта йирик ёнғинлар юзага келди.
Фавқулодда вазиятларни бартараф этиш ишларига юзлаб қутқарувчилар ва махсус техникалар жалб қилинган. Жароҳатланганларга зарур тиббий ёрдам кўрсатилмоқда.
