Сурхондарёда 11 ёшли ўғлини сотишга уринган аёл 3,5 йилга қамалди
Аёл ўғлини 40 миллион сўмга беришга келишган ва 20 миллион сўмни олаётган вақтида қўлга олинган.
Сурхондарё вилоятида 11 ёшли ўғлини 40 миллион сўм эвазига сотишга уринган аёлга нисбатан суд ҳукми эълон қилинди.
Суд ҳужжатларига кўра, айбланувчи ўзига таниш аёл билан 2014 йилда туғилган ўғлини 40 миллион сўмга беришга келишган. Томонлар маблағнинг 20 миллион сўми олдиндан, қолган қисми эса бола харидор номига расмийлаштирилгач тўланишига келишиб олган.
2026 йил 4 апрель куни Термиз шаҳрида ўтказилган тезкор тадбир давомида аёл олдиндан келишилган 20 миллион сўмни олган вақтида ашёвий далиллар билан қўлга олинган.
Суд жараёнида аёл қилмишини оғир моддий аҳволи, қарзлари, уй-жойи йўқлиги ва оилавий муаммолар билан изоҳлаб, айбига иқрор бўлган.
Маълум бўлишича, болани олиши керак бўлган аёл ушбу таклиф ноқонуний эканини англаб, ҳуқуқни муҳофаза қилувчи органларга мурожаат қилган. Шундан сўнг тезкор тадбир ташкил этилган.
Суд аёлни Жиноят кодексининг 135-моддаси 3-қисми «б» банди (одам савдоси) билан айбли деб топиб, Жиноят кодексининг 57-моддаси қўлланган ҳолда 3 йил 6 ой муддатга озодликдан маҳрум қилиш жазосини тайинлади.
Шунингдек, боланинг васийлигини белгилаш масаласи ваколатли давлат органлари зиммасига юклатилди.
