Тошкент вилоятида боласининг таглигига олтин яшириб олиб ўтишга уринган аёл ушланди
Яна бир ҳолатда чет эллик аёл 14 ёшли қизининг кийимлари остига 40 минг долларни яшириб, мамлакатдан олиб чиқишга уринган.
Тошкент вилоятидаги «Навоий» чегара божхона постида болалардан фойдаланилган ҳолда олтин ва хорижий валютани ноқонуний олиб ўтишга уринишларнинг олди олинди. Бу ҳақда Божхона қўмитаси маълум қилди.
Қайд этилишича, мамлакатдан чиқиб кетаётган аёллардан бири гўдак фарзандининг таглигига яширилган қарийб 200 грамм оғирликдаги 2 дона олтин қуймани олиб чиқишга уринган. Шунингдек, унинг ёнидан божхона назоратига тақдим этилмаган 70 грамм заргарлик буюмлари ҳам аниқланган.
Дастлабки ҳисоб-китобларга кўра, ноқонуний олиб чиқишга уринган олтин буюмларнинг умумий қиймати 450 миллион сўмни ташкил этади.
Яна бир ҳолатда эса қўшни давлат фуқароси бўлган аёл 14 ёшли қизининг кийимлари остига 40 минг АҚШ долларини яшириб, уни Ўзбекистондан олиб чиқишга уринган вақтида божхона ходимлари томонидан тўхтатилган.
Божхона қўмитаси вояга етмаганларни ҳуқуқбузарликларга жалб қилиш маъмурий жавобгарликни оғирлаштирувчи ҳолат ҳисобланишини, жиноят содир этишга жалб этиш эса амалдаги қонунчиликка мувофиқ жиноий жавобгарликка сабаб бўлишини эслатди.
Мазкур ҳолатлар юзасидан божхона суриштирувлари давом эттирилмоқда.
