Тошкентдаги котлован ўпирилган ҳудудда ўнлаб дарахт ноқонуний кесилгани аниқланди
Мазкур қурилиш майдонида ноқонуний кесилган дарахтлар оқибатида табиатга 605 миллион сўм, кейинги ҳолатда эса яна 218,3 миллион сўм зарар етказилгани маълум қилинди.
Тошкент шаҳрининг Олмазор туманида 9 қаватли уй ёнида меҳмонхона қурилиши олиб борилаётган ҳудудда экология қонунчилиги талаблари бир неча бор бузилгани аниқланди. Бу ҳақда Тошкент шаҳар Экология ва иқлим ўзгариши бош бошқармаси маълум қилди.
Маълум қилинишича, ижтимоий тармоқларда Беруний кўчасидаги собиқ «Карвонбанк» биноси ўрнида амалга оширилаётган қурилиш ишлари оқибатида дарахтлар ноқонуний кесилаётгани ва уларга зарар етказилаётгани юзасидан мурожаатлар тарқалган. Ўрганишлар давомида ушбу қурилиш объектида экологик қонунчилик талаблари аввал ҳам бир неча бор бузилгани аниқланган.
Хусусан, 2025 йил апрель ойида ҳудуддаги 2 туп чинор белгиланган тартибдаги рухсатномасиз бошқа жойга кўчириб ўтказилгани учун суд қарори билан ҳуқуқбузарга 24,7 миллион сўм жарима ҳамда 6,6 миллион сўм экологик зарар ундирилган.
Шунингдек, орадан бир ҳафта ўтиб, яна 14 туп чинор ноқонуний кўчирилиши оқибатида шикастлангани аниқланиб, суд қарори билан 9,3 миллион сўм жарима ва 42 миллион сўм миқдорида зарар ундирилган.
2025 йил декабрь ойида эса мазкур қурилиш майдонида 6 туп чинор, 3 туп арча ва 1 туп софора ноқонуний кесилгани оқибатида табиатга 605 миллион сўм зарар етказилгани аниқланган. Мазкур ҳолат юзасидан ҳужжатлар ҳуқуқий баҳо бериш учун Бош прокуратурага юборилган. Суд томонидан зарар суммасини ундириш ҳақида қарор қабул қилинган бўлсада, ушбу маблағ ҳозиргача қопланмагани сабабли ҳужжатлар Мажбурий ижро бюросига юборилган.
Бундан ташқари, 2026 йил 13 июль куни ўтказилган навбатдаги назорат тадбирида яна 3 туп чинор таг қисмидан ноқонуний кесилгани аниқланиб, ҳуқуқбузарга нисбатан 10,3 миллион сўм жарима қўллаш ҳамда 218,3 миллион сўм экологик зарар ундириш юзасидан судга даъво аризаси киритилган.
Қайд этилишича, 2024 йилда мазкур ҳудуд хатловдан ўтказилганда жами 46 туп дарахт мавжудлиги қайд этилган. Шунингдек, экологик талаблар бузилгани ва фуқароларнинг мурожаатлари асосида қурилиш учун берилган давлат экологик экспертизаси хулосасини бекор қилиш юзасидан ҳам тегишли мурожаат юборилган.
Экология бошқармаси мазкур қурилиш объектида илгари ҳам бир неча бор маъмурий чоралар қўлланилгани, суд қарорлари чиқарилгани ва ҳуқуқни муҳофаза қилувчи органларга ҳужжатлар юборилганига қарамай, экологик қонунбузарликлар такрорлангани қайд этилди.
Ҳозирда ҳолат юзасидан назорат тадбирлари давом эттирилмоқда.
