Тошкентдаги кўп қаватли уйда ёнғин чиқди, 26 киши эвакуация қилинди
Ёнғин қутқарувчилар томонидан қарийб 1,5 соатда ўчирилган.
Бугун, 5 август куни Тошкент шаҳрининг Олмазор тумани Уста Ширин кўчасида жойлашган кўп қаватли уйнинг 6-кириш йўлагидаги электр қутисида ёнғин содир бўлди.
Фавқулодда вазиятлар вазирлиги маълумотига кўра, ҳодиса ҳақида хабар соат 02:19 да келиб тушган. Қутқарув бўлинмалари воқеа жойига соат 02:25 да етиб бориб, ёнғин соат 03:58 да тўлиқ бартараф этилган.
Ёнғин оқибатида кириш йўлагидаги тахминан 60 погонометр электр кабеллари ёниб зарарланган. Қутқарувчилар томонидан кўп қаватли уйдан 26 нафар фуқаро хавфсиз ҳудудга эвакуация қилинган.
Ҳодиса оқибатида жабрланганлар қайд этилмаган. Айни пайтда ёнғиннинг келиб чиқиш сабаби ва етказилган моддий зарар миқдори аниқланмоқда.
