Ўзбекистон халқ шоири Шарифа Салимова вафот этди
Шоира журналистика, адабиёт ва давлат бошқаруви тизимида узоқ йиллар самарали фаолият юритган.
Ўзбекистон халқ шоири, таниқли адиба ва жамоат арбоби Шарифа Салимова 5 август куни 75 ёшида вафот этди. Бу ҳақда Ўзбекистон Ёзувчилар уюшмаси ахборот хизмати маълум қилди.
Шарифа Салимова 1951 йил 30 декабрда Тошкент вилоятининг Паркент туманида таваллуд топган. Тошкент давлат университетининг журналистика факультетини тамомлагач, Ўзбекистон телевидениеси ва радио тизимида, шунингдек, «Саодат» журнали ҳамда “Ўзбекистон адабиёти ва санъати” ҳафталигида фаолият юритган.
Фаолияти давомида Президент девони, Олий Мажлис тизимида масъул лавозимларда ишлаган, депутат сифатида ҳам самарали фаолият олиб борган.
Шоиранинг “Ҳаёт завқи”, “Менинг баҳорим”, “Хизр булоғи”, “Тонгга қасам” каби асарлари ўзбек адабиётида муносиб ўрин эгаллаган. Унинг қатор шеърлари хонанда Юлдуз Усмонова ижросида қўшиқ сифатида ҳам кенг оммалашган.
Шарифа Салимова 1994 йилда “Ўзбекистон Республикасида хизмат кўрсатган маданият ходими” унвони, 2018 йилда “Меҳнат шуҳрати” ордени билан тақдирланган. 2026 йил 28 май куни эса унга “Ўзбекистон халқ шоири” фахрий унвони берилган.
Маълум қилинишича, марҳуманинг жаноза намози аср намозидан сўнг Чиғатой масжидида ўқилади.
