Ўзбекистон ва Қирғизистон ҳудудларни алмашишнинг амалий босқичини бошлади
Аҳолини рўйхатга олиш ишлари якунлангач, уларга Қирғизистон фуқаролигини бериш бўйича белгиланган тартиблар бошланади.
Ўзбекистон ва Қирғизистон давлат чегарасини демаркация қилиш ҳамда ер участкаларини алмашиш бўйича эришилган келишувлар доирасида Чон-Гара ва Тош-Добо қишлоқларини топшириш юзасидан ташкилий ва техник ишларни бошлади.
24.kg нашрининг маълум қилишича, ушбу жараён илгари Фарғона вилояти таркибида бўлган Чон-Гара ва Тош-Добо қишлоқларини расмий топшириш бўйича амалга оширилмоқда.
24 июль куни Қадамжой туманида икки давлат қўшма ишчи комиссиясининг навбатдаги йиғилиши ўтказилиб, ҳудуд аҳолиси фуқаролиги, кўчириш, мулкий масалалар ҳамда бошқа ташкилий жараёнлар муҳокама қилинган.
3 августдан бошлаб қўшма ишчи гуруҳлар бевосита қишлоқларда иш бошлаган. Мутахассислар аҳолини рўйхатга олиш, ҳужжатларни расмийлаштириш ҳамда кейинги тартиб-таомиллар бўйича тушунтириш ишларини олиб бормоқда.
Қирғизистон делегациясига Президентнинг Боткен вилоятидаги ваколатли вакили биринчи ўринбосари Бактибек Токсонбаев, Ўзбекистон делегациясига эса Ички ишлар вазирлиги Миграция ва шахсийлаштириш департаменти бошлиғи ўринбосари Беҳзод Сайфуллаев раҳбарлик қилмоқда.
Дастлабки маълумотларга кўра, Чон-Гара ва Тош-Добо қишлоқларида қарийб 2,5 минг киши истиқомат қилади. Аҳолини рўйхатга олиш ишлари якунлангач, уларга Қирғизистон фуқаролигини бериш бўйича белгиланган тартиблар бошланади.
Келишувга мувофиқ, Қирғизистон Ўзбекистонга тенг майдондаги ер участкаларини тақдим этади.
