Ўзбекистоннинг Истанбулдаги Бош консулхонаси фуқароларни эҳтиёткор бўлишга чақирди
Дипломатик ваколатхона маълумотига кўра, Истанбулнинг гавжум сайёҳлик масканларида паспорт, пул ва қўл сумкаларини ўғирлаш ҳолатлари кўпайган.
Ўзбекистоннинг Истанбул шаҳридаги Бош консулхонаси Туркияга ташриф буюраётган фуқароларни ҳушёр ва эҳтиёткор бўлишга чақирди.
Маълум қилинишича, сўнгги вақтларда Истанбулнинг сайёҳлар гавжум бўладиган ҳудудларида, хусусан Султон Аҳмад ва Ая София атрофида қўл сумкалари, паспорт, нақд пул ҳамда бошқа қимматбаҳо буюмларни ўғирлаш ҳолатлари кўпайган.
Кузатув камералари тасвирлари ва ўрганишларга кўра, айрим ҳолатларда ўғриликлар вояга етмаган шахслар томонидан содир этилмоқда. Уларнинг ёши сабабли қонунчиликда назарда тутилган чораларни қўллаш муайян вақт талаб қилиши қайд этилган.
Шу муносабат билан Бош консулхона фуқароларга қўл сумкасини доимо назоратда сақлаш, паспорт ва пулни бир жойда олиб юрмаслик, гавжум масканларда ҳушёр бўлиш ҳамда зарурат бўлмаса, катта миқдордаги нақд пул олиб юрмасликни тавсия этди.
Шунингдек, ўғрилик ҳолатига дуч келган фуқароларга зудлик билан Туркия ҳуқуқни муҳофаза қилувчи органларига мурожаат қилиш ва Ўзбекистоннинг Истанбулдаги Бош консулхонасини хабардор қилиш тавсия этилди.
