Инфантино узр сўради

 

FIFA Марокашда ўтказилган фавқулодда йиғилиш якунида Жаҳон чемпионати тижорат ҳуқуқларининг 20 фоизини 4,2 миллиард долларга хусусий инвесторларга сотиш бўйича бекор қилинган ташаббус сабаб ташкилот аъзоларидан расман узр сўради. Баёнотда лойиҳа тайёрланиши ва муҳокама қилиниши жараёнида миллий футбол ассоциациялари етарли даражада жалб этилмагани тан олинган. Бу ҳақда Reutres хабар берди.

 
Йиғилишда FIFA президенти Жанни Инфантино, бош котиб Маттиас Графстрём, операцион директор Кевин Ламур ҳамда ташкилотнинг бошқа юқори мартабали раҳбарлари иштирок этган. Раҳбарият тижорат ҳуқуқларини сотиш ташаббуси юзасидан юзага келган норозиликларни муҳокама қилиб, келгусида шундай муҳим қарорлар янада шаффоф тартибда қабул қилинишини билдирган.

 
FIFA баёнотида ташкилот раҳбарияти Инфантинони қўллаб-қувватлашда давом этаётгани ҳам таъкидлаган. Шу билан бирга, бош котиб Маттиас Графстрём ва операцион директор Кевин Ламур лойиҳа амалга оширилиш усули кўнгилдагидек бўлмаганини тан олиб, бу жараён ташкилот ичида ҳам норозилик уйғотганини қайд этган.

 
Жаҳон чемпионати тижорат ҳуқуқларининг бир қисмини сотиш режаси UEFA, CONCACAF, Осиё футбол конфедерацияси ҳамда Европанинг қатор клублари томонидан кескин танқид қилинган эди. Можаро ортидан айрим футбол амалдорлари Жанни Инфантинонинг истеъфосини талаб қилган. Бироқ, FIFА президенти Африка, Осиё ва Океаниядаги кўплаб миллий ассоциациялар қўлловини сақлаб қолмоқда. Ҳозирча 2027 йил март ойида бўлиб ўтадиган FIFА президентлиги сайловида унга қарши ягона кучли номзод ҳам топилмаган.