"Микробизнесдан йирик лойиҳаларга": Бизнесни ривожлантириш банки тадбиркорлар билан учрашди
Янгийўлда Бизнесни ривожлантириш банки ҳамда Ўзбекистон маҳаллалари уюшмаси ҳамкорлигида ўтказилган очиқ мулоқотда тадбиркорликни молиялаштириш, имтиёзли кредитлар, давлат дастурлари ва бизнесни кенгайтириш масалалари муҳокама қилиниб, тадбиркорларнинг мурожаатларига амалий ечимлар ишлаб чиқилди.
Тошкент вилояти Янгийўл туманидаги «Халқобод» маҳалласида “Микробизнесдан йирик лойиҳаларга: маҳалладаги тадбиркорликни молиявий қўллаб-қувватлаш” мавзусида давра суҳбати ўтказилди.
Мазкур тадбир Ўзбекистон давлат мустақиллигининг 35 йиллиги муносабати билан эълон қилинган “Маҳаллада ободлик ва меҳр-саховат ойлиги” ҳамда “Долзарб 40 кунлик” тадбирлари доирасида Бизнесни ривожлантириш банки, Ўзбекистон маҳаллалар уюшмаси ва Янгийўл тумани ҳокимлиги ҳамкорлигида ташкил этилди.
Унда Бизнесни ривожлантириш банки ва Ўзбекистон маҳаллалар уюшмаси мутасаддилари, Янгийўл тумани ҳокимлиги вакиллари, банк мутахассислари, маҳаллий тадбиркорлар ҳамда оммавий ахборот воситалари вакиллари иштирок этди.
Учрашувдан кўзланган асосий мақсад маҳаллаларда тадбиркорликни ривожлантириш, бизнес субъектларини молиявий қўллаб-қувватлаш, банк хизматларидан фойдаланиш имкониятларини кенгайтириш, тадбиркорларни қийнаётган муаммоларни бевосита тинглаш ҳамда уларга амалий ечимлар ишлаб чиқишдан иборат бўлди.
Тадбир аввалида иштирокчиларга Бизнесни ривожлантириш банки томонидан тақдим этилаётган молиявий маҳсулотлар ва хизматлар кўргазмаси намойиш этилди. Шунингдек, тадбиркорликни қўллаб-қувватлашга оид ахборот материаллари тарқатилди.
Давра суҳбати давомида тадбиркорликни молиялаштириш имкониятлари, имтиёзли кредит маҳсулотлари, давлат дастурлари, маҳаллабай ишлаш тизими ҳамда ҳудуднинг иқтисодий салоҳиятидан самарали фойдаланиш масалалари юзасидан тақдимотлар ўтказилди.
Очиқ мулоқот форматида ташкил этилган учрашувда тадбиркорлар кредит ажратиш тартиби, гаров таъминоти, рухсатномалар олиш, бизнес фаолиятини кенгайтириш ва давлат томонидан яратилаётган имкониятлар бўйича ўзларини қизиқтирган саволларни мутахассисларга йўллаб, батафсил жавоб олдилар. Қатор мурожаатлар юзасидан амалий ечимлар белгиланди.
Тадбир якунида тадбиркорлик субъектларини молиявий қўллаб-қувватлаш, янги иш ўринларини яратиш, ҳудудларда бизнес муҳитини янада яхшилаш ҳамда банк ва тадбиркорлар ўртасидаги очиқ мулоқотни тизимли равишда давом эттириш бўйича устувор вазифалар белгилаб олинди.
