Нетаняху билан айрим масалаларда келишмовчиликлар бор — Венс

 

АҚШ вице-президенти Ж.Д. Венс Исроил Бош вазири Бенямин Нетаняху билан айрим масалаларда фикрлар тафовути мавжудлигини тан олди.

 

Fox News телеканалига берган интервьюсида Венс АҚШ ва Исроил яқин иттифоқчи давлатлар бўлсада, айрим масалаларда қарашлар турлича бўлиши табиий эканини таъкидлаган.

 

Унинг сўзларига кўра, АҚШ манфаатлари Исроил манфаатлари билан мос келган ҳолатларда икки томон умумий мақсадларга эришиш йўлларини муҳокама қилади. Қарашлар бир-биридан фарқ қилган вазиятларда эса бу масалалар очиқ ва ҳалол тарзда муҳокама қилинади.

 

Венс АҚШ вице-президенти сифатидаги асосий вазифаси мамлакат манфаатларини ҳимоя қилиш эканини қайд этган.. Шунингдек, у Эрон билан боғлиқ вазиятни дипломатик йўл билан ҳал этишга интилаётганини билдириб, бу жараёнда баъзан олдинга силжиш ва ортга чекинишлар кузатилишини таъкидлаган.

 

Ахиос нашри аввалроқ Ж.Д. Венс ва Бенямин Нетаняху ўртасида Эрон масаласи ҳамда дипломатик ёндашув бўйича келишмовчиликлар шахсий даражагача етгани ҳақида хабар берган эди. Нашр маълумотига кўра, Нетаняху Венснинг Исроил ҳукумати фаолияти ва Эрон билан боғлиқ сиёсат юзасидан билдирган танқидларидан норози бўлган.

 

Бироқ Венс сўнгги суҳбат чоғида Нетаняху томонидан унга нисбатан ҳеч қандай босим ёки кескин муносабат бўлмаганини ҳам алоҳида таъкидлаган.