Самарқандда электр таъминоти корхонаси раҳбари 5 минг доллар пора билан ушланди
Тошкентда эса ўқишга киритиб қўйиш эвазига 13 минг доллар олган шахс қўлга тушди.
Самарқанд вилояти ва Тошкент шаҳрида коррупция ҳамда фирибгарлик билан боғлиқ икки ҳолат фош этилди. Бу ҳақда Давлат хавфсизлик хизмати маълум қилди.
Маълум қилинишича, Самарқанд вилоятидаги туманлардан бирининг Электр таъминоти корхонаси раҳбари маҳаллий тадбиркорга тегишли умумий овқатланиш шохобчасида электр тармоғига ноқонуний уланиш оқибатида давлатга етказилган 393 миллион сўмлик зарар бўйича жиноий жавобгарликка тортмаслик ҳамда зарар миқдорини камайтириб, маъмурий тартибда расмийлаштириб бериш эвазига 5 минг АҚШ доллари талаб қилган.
У жорий йил июль ойида ушбу маблағнинг 4 минг долларини олган, қолган 1 минг долларни эса учинчи шахс орқали олаётган вақтида Давлат хавфсизлик хизмати ҳамда Бош прокуратура ҳузуридаги Иқтисодий жиноятларга қарши курашиш департаменти ходимлари томонидан қўлга олинган.
Қайд этилишича, мазкур мансабдор аввал ҳам судланган бўлишига қарамай, яна ноқонуний ҳаракат содир этган.
Яна бир ҳолатда Тошкент шаҳрида яшовчи, 1988 йилда туғилган ва муқаддам судланган шахс ўзининг юқори лавозимда ишловчи танишлари орқали фуқарони Тошкент давлат иқтисодиёт университетига ўқишга киритиб қўйиш эвазига 20 минг АҚШ доллари талаб қилган.
Тезкор тадбир давомида у олдиндан 13 минг АҚШ доллари олаётган вақтида ашёвий далиллар билан ушланди.
Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
