Шимолий Корея қисқа масофали баллистик ракета учирди
Жанубий Корея ва Япония ҳарбийлари синовни қайд этиб, вазиятни кузатишни кучайтирди.
Шимолий Корея 6 август куни шарқий қирғоқдаги Вонсан ҳудудидан қисқа масофали баллистик ракета учирди. Жанубий Корея Бирлашган штаб бошлиқлари қўмитаси ракета Япон денгизи томонга учирилганини маълум қилди. Бу ҳақда Аpnews хабар берди.
Ракетанинг аниқ учиш масофаси ва техник тавсифлари ҳозирча ошкор этилмаган. Жанубий Корея ҳарбийлари АҚШ ва Япония билан биргаликда ракета парвозига оид маълумотларни таҳлил қилмоқда ҳамда кузатув ва жанговар шайлик даражасини кучайтирган. Япония Мудофаа вазирлиги ҳам ракета мамлакат ҳудуди ёки унинг эксклюзив иқтисодий зонасига тушмаганини тасдиқлади.
Шимолий Корея сўнгги йилларда турли турдаги баллистик ракеталар, қанотли ракеталар, гипертовушли қурол тизимлари ҳамда сувости кемаларидан учириладиган ракеталарни мунтазам синовдан ўтказиб келмоқда. Пхенян бу дастурларни мамлакат мудофаа салоҳиятини мустаҳкамлаш зарурати билан изоҳлаб келади. Мамлакат раҳбари Ким Чен Ин ядровий ва ракета салоҳиятини янада кучайтиришни давлат сиёсатининг устувор йўналишларидан бири сифатида белгилаган.
АҚШ, Жанубий Корея ва Япония эса бундай ракета учиришларини БМТ Хавфсизлик кенгаши резолюцияларига зид деб ҳисоблайди. Шу сабабли уч давлат ҳарбий ва разведка соҳасидаги ҳамкорликни кенгайтириб, Корея яриморолида ҳаво ҳужумидан мудофаа тизимлари ҳамда ракеталарни эрта аниқлаш имкониятларини кучайтиришга алоҳида эътибор қаратмоқда.
